काठमाडौं — रसुवाको भोटेकोशी नदीको माथिल्लो क्षेत्रमा पहिरो तथा गेग्रानले नदी थुनिएर बनेको प्राकृतिक ताल फुट्न सक्ने जोखिम बढेपछि सरकारले तल्लो तटीय क्षेत्रका बासिन्दालाई उच्च सतर्कता अपनाउन आग्रह गरेको छ।
चीनबाट नेपालको परराष्ट्र मन्त्रालयमार्फत प्राप्त भू–उपग्रह तस्बिर तथा प्रारम्भिक प्राविधिक विश्लेषणअनुसार, यसअघि विनाशकारी बाढी उत्पन्न भएको क्षेत्रमै नदी थुनिएर नयाँ ताल बनेको देखिएको छ। तालमा पानी निरन्तर जम्मा भइरहेकाले प्राकृतिक अवरोध भत्किएमा भोटेकोशी तथा त्रिशूली नदीमा पुनः आकस्मिक ठूलो बाढी आउन सक्ने खतरा रहेको अधिकारीहरूले बताएका छन्।
यो मानव निर्मित बाँध नभई पहिरो, ढुंगा र गेग्रानले नदीको बहाव अवरुद्ध हुँदा बनेको प्राकृतिक ताल हो। पानीको मात्रा र दबाब बढ्दै गएमा अवरोध जुनसुकै बेला फुट्न सक्ने भएकाले जोखिम अझै टरेको छैन।
बाढी पूर्वानुमान महाशाखाले अर्को सूचना जारी नभएसम्म भोटेकोशी तथा त्रिशूली नदीको किनार, होचा भूभाग र जोखिमयुक्त क्षेत्रमा नबस्न अनुरोध गरेको छ। उद्धारमा खटिएका टोली, यात्रु तथा स्थानीय बासिन्दालाई समेत नदीकिनार छाडेर सुरक्षित उचाइमा जान भनिएको छ।
सम्भावित बाढीबाट रसुवा, नुवाकोट, धादिङ र चितवनसम्मका नदी तटीय क्षेत्र प्रभावित हुन सक्ने भएकाले सम्बन्धित जिल्लामा विशेष सतर्कता अपनाउन आग्रह गरिएको छ। चीनले पनि नदी थुनिएर बनेको तालको अवस्था निगरानी गरिरहेको र सम्भावित जोखिमबारे नेपाललाई जानकारी गराएको छ।
स्थानीय बासिन्दालाई बाढी हेर्न, भिडियो खिच्न वा पुल तथा नदीकिनार नजिक जान नहुने चेतावनी दिइएको छ। आधिकारिक निकायबाट जारी हुने सूचना नियमित रूपमा हेर्न तथा स्थानीय प्रशासनको निर्देशन पालना गर्न अनुरोध गरिएको छ।
US नेपाल खबर सबैलाई यो अत्यन्त जरुरी सूचना परिवार, आफन्त र नदी तटीय क्षेत्रमा रहेका व्यक्तिसम्म तत्काल पुर्याउन अपिल गर्दछ। समयमै अपनाइएको सतर्कताले अमूल्य जीवन जोगाउन सक्छ।
